[اسامة العقابي]

مــو هـذا اتــفاقـي ويــاك غــلطـان
اتـفقـت اتروح من ايـطمني التـراب



عفتني بعز شبابي اتعوفني اشلون
مــــــا فــكـرت بـعدك راح اظـل شـاب



السمه اتشك بيه جي عيني اعله النجوم
استحت ظلت اتلبس انجومهه اثياب



لا تــحلفـلي بـاجــر حــالـف اتــعــود
مــا تــرجــعـلي كـلــبك كــال جـذاب



وصـلــت ويــاك لاخــر نقطه بالــكون
والـــجذاب حــده العتــبة البـاب



ومـشــابك جان يومك يخلص وياي
واجي وبظهري تطلع ناسي الكراب



وكلتلك عوفني وليغرك الطيب
ترى مرات احول كلبي سرداب



وكلتلك صير زين ومو فرد نوب
ولو حباب مو الــــه من الاحباب



يالجفك املبسه اجفوف عصفور
وجه بس هوه جفك جف الذياب



بنيت ابراسي جامع خطوة وايمام
وانت ابليس هم طاريك ينجاب



واجيت وتوني جاي اتعلم انساك
وفتح بابه الكلب مو باب العتاب



وتلمست كلبك وانت مديت
جفك شفت جرحي من الطعن طاب



اذا ما شال حب كلبك شسميك
بلا عنوان مابي معنى الكتاب



وردت وياك اصفي احساب الايام
صفه كلبي وتعب جفي من الحساب



وسامحتك وكتلك نرجع احباب
سكت وجن كلمتك كوة تنجاب



ثاري استحه السانك ما رضه ايصيح
لان شم بكلمتك ريحت اجناب


موضوع جميل يسلموووووو