[عـازف الآهـات]

الشمس غابت وكل ٍ دوّر سراجه
والشوق جمّر محرّ الشوق لا جمّر
دام اتجاهك شمال مودعك حاجه
سلّم على حايل وسلّم على شمّر
قدامك الخافق اللي ينشد علاجه
كنه معلّق على برزان ومسمّر
وانت تعرف يا بعد حيي من تواجه
بيضان الافعال لا من الزمن سمّر
ان ضاقوا أعنف من البحر ومن امواجه
وان راقوا اركد من الخرمان لا عمّر
كم صيت بيت ٍ عتق في الباب مزلاجه
وكم شيخ اماره قبل تعيينه مؤمر
وكم حاتمي ٍ تكفيّ فلّة حجاجه
وش لون للضيف لو عن ساعده شمّر
وان مر تاريخهم متلبس ٍ تاجه
كم عاشق ٍ كيّف وكم حاسد ٍ زمّر
في جو ٍ اغلى على الرجلي الى داجه
من ديرة السادس ومن ديرة معمّر
كنّه الى اهدى له البراق فجاجه
طلت غرير ٍ ضحك ومن الخجل حمّر
توارثوا حرثه وتمتير ديباجه
ركابة الجيب من ركابة الضمّر
الودّ لا غرس بدري صعب مخراجه
والله ولا الذّ واحلى منه لا ثمّر
ادخل على اللي تطوف البيت حجاجه
من ناقص ٍ عند مدح الغير يتذمّر
والمدح لو كان في الرديان للصاجه
ويقال عمّر بلد بالعون ما عمّر
والذّم لو زاد في الطيب تولاجه
لا احرق ولا اغرق ولا عمّر ولا دمّر
ماني بمتحسب بشعري على حاجه
الا اني اروح ما غنيت في شمّر