[عـازف الآهـات]

الشعر : تحريك ساكن من مدار السكون
خلق الحياة لـــ جمادٍ ما يعرف الحياه

إحساس طاير , تميل بمحتواه الغصون
نهرٍ مجاريه تجري عكس مجرى المياه

ياخذ من العقل ما يغري لـــ فعل الجنون
وللغي ياخذ طريق الرشد واللي غواه

تنهيدته ... لونها ,, ما يحتمله أي لون
زفرةٍ محبٍ ترك باقي سنينه وراه

يقرا فـــ صمت الشفايف ما تقول العيون
ويشرح من أسرارها ما لا قرته الشفاه

ماله مواعيد , ليه يواعد اللي يمون !
الوقت من يبتدي بـــ اسمه إلى منتهاه

أحيان ,, يشبه حبيب لمن يحبه يخون
وأحيان ,, ما يشبهه عاشق فـــ قمة وفاه

كم مرةٍ سال في صدري مثل ما يكون :
ينفث بي الروح لا من نبضي فــ يوم تاه

مرات , ياخذ يدي , قبل اسأله : من يكون
يبلغ مدى رحلتي ,, قدام لا أبلغ مداه !

يا شعر .. كم شفت بك وجهٍ رقيق حنون
ألوذ به , واتنفس به , وتمطر سماه

للغايب اللي غيابه للتعب ذو شجون
يا ليته يحس باللي لو نسى ما نساه

في غيبته , كل من غابوا عسى ما يجون
علّقت به عمري , وغاب , وفقدت الحياه !