والله كبرت بعيوني يا نظـر عينـي
يوم ٍنسيت الخطأ اللي صارمن زلـة
ومن كبر حجم الغلا مابينـك وبينـي
يصعب على عاذلي بالمكر ياصل لـه
مادام تسري غلاتـك فـي شرايينـي
كيف الغلا من صميم القلـب بيشلـه
دام أنت مثلي بماي العيـن شارينـي
خل الحقود الحسود يموت من غلـه
يكفيني انك على مـا بـي تراعينـي
وتنظر بعين الرضـى للخـل وتجلـه
وهذا الذي جابني لـك قبـل تأتينـي
ابغي مكـان ٍ خبرتـك فيـه وأدلـه
فيني ولع من على المقناص ناوينـي
والقلب سبقه من أقصى الجوف قد تله
محمي من الشوق كنه فرخ شاهينـي
صايد وراعيه دون الطعس حول لـه
ومن واهج ٍ دك صدري واشتعل فيني
القلب فـاح بغلاتـك فوحـة الدلـة
ومن يوم حطيت راحت يدْك بيدينـي
حسيت كني ملكـت الكـون ذا كلـه
وفي لحظة ٍ جات فيها عينك بعينـي
قلب العنى طاب مما فيه مـن علـة
مادام أنا أبغيك وأنت تقـول تبغينـي
خلني بغني لحن مغنـاي فـي شلـه
واخلي الناس تدعي لـك وتدعينـي
إني قتيل الهوى اللي مات فـي خلـه