الفقرة الثالثة
في كل القصص والروايات أشوف الصبر يتعبْ
وأشوف الأمل كل فصل يمشي وبنفسه يتقربْ
ولا شافت عيوني قصة ورواية مثل زينبْ
في كل صفحة تلقى الألم يكبر إش هالصبر ياربْ
وإلي أغرب إني كلما أرجع من أولْ
التقي بجرح إكتشفته وتوه تمثلْ
يعني تتخيَّل .. يرحل المجروح وطيف جروحه ما يرحلْ
من مثل هالغربة صارت أكبر أوطانهْ
تروي التراب بدمعها وهيَّ عطشانهْ
هذي إنسانة ؟؟ لو هي صورة معجزة من الباري سبحانه ؟؟
من صغر سنها .. والصبر فنها .. تكبر وكأنها .. عالم جروحْ
همها متواصل .. كل بدر آفل .. لا أخو كافل .. إلا مذبوحْ
أخطر لك فصول إذا رايد ونكتفي بعاشر
ولا العاشر بكبره خل البداية من الآخر !
عليك الله تقدر تشوف الأهل طعمه للباتر ؟
وقبل لا تواريها تتركها مرمية وتسافر ؟
إنت لو حط على إيدك طير وربيته
لو يموت بحفرة دمعك فوقه صبيته !
وإلي حبيته .. ما تدفنه وهذا قلبك من قبل بيته !!
هذي زينب يا بعد كل دمعة بعيوني
من على الهازل تصيح اشويه مهلوني
فدوة خلوني .. أدفن أحبابي واسافر والله دفنوني
ما جرحتوني .. ما ذبحتوني .. يالمنعتوني .. حتى الوداع
عزي ترمونه .. ما تدفنونه .. شالتخافونه .. والأمل ضاع
أوقف ويا اللحظة واسمع زينب اش عدها وتقول
لمن بمشيتها دارت والعتب نار ويطول
خوية ما ردت امشي عنك يا بعد قلب الرسول
لكن اش بيدي على حالي أعتذر يا بن البتول
دمعي ال يهل .. غسل .. إذا قبلته مني
هاك الصبر .. قبر .. عليك اهله حزني
لكن أسألك يا خوية ما يحز في قلبك .. مالي والي
وإلا شخصي يا عزيزي منَّسي وعليكم .. ما هو غالي
تذكر إش يسوي حيدر الغيور إليَّ .. من دلالي
ما حد بحياته شاف ولا نظر لشعرة من خيالي
ثاني نظرة وثاني دمعة ردَّت تشب الخيم
هذي للعباس أخوها آهـ يا شيَّال العلم
ما تحط عينك في عيني وأدري وش سوى السهم
لكن اختك هم عليها صوَّب سهامه الألم
يا بو الفضل .. تضل .. يا خوية عالشريعة
وين للوعد .. عهد .. كتبته للوديعة
ياللي قلت أخلي زينب اختي على راسي .. وين وعدك
هذي زينب على ناقة رد عليَّ منهو .. ليها بعدك
والله يا كفيلي لو حياتي مني تطلب .. ما أردك
ما أظن إذا خذوني عرضة في المجالس .. عادي عندك
ويَّاها كل ذرَّة صاحت .. على زينب الجنة ناحت
حسافة الي والدها حيدر .. بعد عزها الله أكبر
في ولية عدا راحت
هانت على الدنيا هانت .. لياليها بالعزة خانت
من الي تركها وحيدة .. يجي ويمسح عليها بيده
أمانة علي حيدر
لكن على المآسي والغربة والهجر
ما طاعت المذلة والتزمت الصبر
لو شافت الي شافت برحلة اليسر
ما خانت الكرامة والعفة والستر
كل ال شافوا الضعن وأوقفوا يمها
قالوا زينب الصبر يجري في دمها
مو راس أخوها شايلينه
ما شب قلبها من حنينه
كل ما تشوفه هالحزينة
تاخذ عزمها من جبينه
يبكي على زينب عدوها .. عقب ما فجعها بأخوها
مشت للقصر والله حارس .. ومن الهيبة وسط المجالس
أعاديها عرفوها
ويَّا الحرم دخلوها .. هدية أسف مثلوها
أسيرة وتحن عالأسارى .. ولأنها الي تأوي الحيارى
يتاماها حفوها
ما تبكي من ألمها .. تبكي على البشر
القلوب وصارت على .. سبط النبي حجر
قطعوا ملاذ ورحمة .. ما قطعوا النحر
سدُّوا امل في ثوبه .. ما سدوا النهر
زينب دمعة واعية .. توفي حق الدم
ما تندم على الجرح .. والله ما تندم
جمرتها في الصدر دفينة .. لكن على الصبر أمينة
منصورة رجعت المدينة .. والحرة ما تضل رهينة